Xosé Merelles, director de Turismo de Galicia, deu a coñecer que houbo un crecemento do 54,6 por cento do número de visitantes e do 94,5 por cento nas pernoctacións
O xeodestino Trevinca-Valdeorras rexistrou durante os meses de xullo e agosto de 2026 un notable incremento da actividade turística, con 5.295 viaxeiros e 13.680 noites, o que supón un crecemento do 54,6% no número de visitantes e do 94,5% nas pernoctacións respecto ao mesmo período de 2025. Así o puxo de manifesto o director de Turismo de Galicia, Xosé Merelles, no decurso dunha comparecencia parlamentaria na que fixo balance dos datos turísticos do pasado verán e na que subliñou que os resultados rexistrados neste xeodestino lideran o crecemento do verán en Galicia.
O director de Turismo enmarcou estes resultados nunha estratexia de impulso turístico que busca complementar os atractivos propios de Trevinca-Valdeorras cunha programación cultural, musical e enogastronómica capaz de xerar novos motivos para visitar a comarca.
Neste sentido, a Xunta de Galicia, a través de Turismo de Galicia, apoia iniciativas que contribúen a enriquecer a oferta turística e a ampliar as posibilidades de desfrute do destino durante o verán e ao longo do resto do ano.
Entre as iniciativas que contribuíron a dinamizar a comarca figuran citas musicais como o SilFest Valdeorras (O Barco), O Son da Estación (A Rúa), a programación de Orballo Cultural, Ou Yeah e V Nove Camiño Valdeorras ao longo do verán.
Apoio ao enoturismo
Ao mesmo tempo, a Xunta está a apoiar outro dos recursos turísticos desta zona como é o enoturismo a través do apoio á Ruta do Viño de Valdeorras co obxectivo de aproveitar o potencial vitivinícola da comarca e seguir atraendo visitantes unha vez rematado o verán. Neste sentido, este 2026, Turismo de Galicia contribuíu a deseñar unha axenda de actividades vinculadas á viticultura durante o mes de setembro, coincidindo coa época de vendima e favorecendo a desestacionalización.
A combinación de eventos culturais con experiencias vinculadas á natureza, ao patrimonio e á cultura do viño permite avanzar cara a un modelo turístico máis diversificado, con capacidade para atraer diferentes perfís de visitantes e xerar actividade máis alá dos períodos de maior afluencia.
O xeodestino Trevinca-Valdeorras engloba aos concellos de O Barco de Valdeorras, O Bolo, Carballeda de Valdeorras, Larouco, Petín, A Rúa, Rubiá, A Veiga e Vilamartín de Valdeorras.
