Realiza unha xornada especial para poñer en valor a lingua e a cultura galega
O ANPA do CEIP Manuel Respino organiza o vindeiro 16 de maio unha xornada especial para celebrar o Día das Letras Galegas cunha actividade aberta ás familias e á veciñanza, pensada para promover a convivencia e poñer en valor a lingua e a cultura galega.
O encontro terá lugar no Aguillón, no antigo campo de fútbol, en horario de 11:00 a 13:30 horas, e contará cun programa cheo de actividades para todas as idades. Durante a mañá haberá xogos, música tradicional da man de Abertal e momentos dedicados á poesía galega, nun ambiente festivo e participativo.
Desde o ANPA destacan que o obxectivo desta iniciativa é crear espazos de encontro entre familias, fomentar o uso e o orgullo da lingua galega entre os máis pequenos e fortalecer os lazos de comunidade arredor do colexio.
Ademais, todas as persoas que o desexen poderán traer comida para compartir e quedar a xantar nun ambiente tipo picnic, aproveitando a ocasión para desfrutar dunha xornada ao aire libre e en boa compañía.
O ANPA do CEIP Manuel Respino anima a todas as familias e persoas da contorna a participar nesta celebración das Letras Galegas, convertendo a mañá nunha festa da cultura, da música e da convivencia.
