Agasallou cun marcapáxinas conmemorativo do Día de Rosalía de Castro ás personas que participaron na iniciativa e tamén lembrou «que nos tamén fomos emigrantes»
O alumnado de sexto curso do CEIP Condesa de Fenosa do Barco argallaou unha homenaxe para celebrar o día de Rosalía de Castro consistente nun recitado público do seu poema «Adiós ríos, adiós fontes».
O lugar elixido para desenvolver esta sinxela homenaxe foi a Praza do Concello do Barco onde, ao xeito dos homes libro de Ray Bradbury, foron debullando as estrofas do seu poema para toda a xente que pasou por este espazo.
Ao remate do percorrido polas distintas estrofas do poema, alumnas e alumnos agasallaron cun marcapáxinas conmemorativo ás persoas que participaron na iniciativa.
O recitado estivo acompañado dunha representación plástica do contido de candansúa estrofa, co que se fixo mais comprensíbel, se cadra, o significado profundo do poema mesmo a persoas que non tiñan dominio da lingua galega.
«Nestes tempos onde se espallan polas redes sociais discursos de odio contra o emigrante, o poema de Rosalía adquire incluso unha maior vixencia, lembrándonos da dor profunda que acompaña ao emigrante cando ten que abandoar na procura de mellores condicións todo aquilo que é a súa vida», expón o CEIP Condesa de Fenosa.
«Tamén nos lembra —engade— que nós fomos terra de emigrantes, que as nosas familias ben saben as dificultades que tivemos que pasar nas terras de adopción, e así, nun exercicio de empatía comprender, axudar e acompañar aos inmigrantes que arestora se achegan á nosa terra na procura dun futuro».
