A pasada noite decidiuse trasladar a unha paciente á unidade de partos do Hospital Universitario de Ourense
O BNG de Valdeorras deu a coñecer hoxe que as mulleres embarazadas da comarca son derivadas a dar a luz a Ourense desde hai días, despois de avariarse a incubadora do Hospital Público de Valdeorras.
O BNG comarcal demanda unha resposta urxente do Sergas que permita restablecer o servizo e garantir a atención sanitaria segura para nais, bebés e lactantes.
Sinala que é unha situación mais que avala o desmantelamento do Hospital Público de Valdeorras. «Queremos unha sanidade digna para a veciñanza», manifesta.
O Bloque Nacionalista Galego presentará unha iniciativa para pedir explicacións da actual carencia no Parlamento galego.
«Atópase operativa pero emitiu un aviso de erro»
Pola súa banda, o Sergas afirma que incubadora destinada aos traslados da unidade de partos do Hospital Público de Valdeorras atópase operativa nestes momentos, aínda que nas últimas datas emitiu un aviso de erro nunha das súas pezas sendo revisada e reparada polos técnicos do servizo de electromedicina da área sanitaria.
Argumenta que os técnicos especializados da empresa responsable da incubadora desprazaranse mañá, 11 de novembro, ao Hospital Público de Valdeorras, co obxectivo de avaliar e reparar definitivamente a incidencia, de xeito que o equipo poida seguir empregándose con normalidade e todas as garantías que requiren un posible traslado dun recentemente nacido no caso de ser necesario seguindo os protocolos establecidos.
Para garantir a máxima seguridade e protección dos bebés e das nais, esta pasada noite decidiuse trasladar a unha paciente á unidade de partos do Hospital Universitario de Ourense, onde o proceso puido desenvolverse con total seguridade e normalidade.
O Hospital Público de Valdeorras quere agradecer o esforzo e a colaboración de todos os profesionais implicados, así como tranquilizar á poboación, asegurando que en ningún momento está comprometida a atención nin a seguridade asistencial.
