«Elas, produtoras executivas» chegará o IES Martaguisela o 27 de marzo

Publicidad

O documental está dirixido ao alumnado de 4º da ESO. busca espertar vocacións, descubrir en que consiste a produción executiva e dar visibilidade ás produtoras executivas galegas 

A Deputación de Ourense e a Asociación Galega de Produtoras Independentes (Agapi) organizan o roteiro «Elas, produtoras executivas. Unha iniciativa para o empoderamento feminino», que percorre dende hoxe centros de ensino secundario de toda a provincia. Chegará ao IES Martaguisela do Barco de Valdeorras o vindeiro 27 de marzo.

O roteiro está dirixido ao alumnado de 4º da ESO por ser o curso inmediatamente anterior ao Bacharelato, etapa crucial na selección e dirección dos estudos do futuro, e busca aumentar o interese no feminismo, incrementar a conciencia crítica da xuventude, descubrir en que consiste a produción executiva e dar visibilidade ás produtoras executivas galegas. 

O presidente da Deputación, Manuel Baltar, define este roteiro como “unha nova ferramenta para concienciar á mocidade no valor da igualdade, tendo como punto de partida o sector audiovisual e servindo de inspiración para potenciar a figura da muller en calquera outro ámbito da sociedade. Esta iniciativa é unha achega máis na loita pola igualdade, unha causa xusta da que a Deputación de Ourense sempre formará parte”. 

Publicidad
Publicidad

Manuel Baltar explica que “precisamente, o eido do audiovisual constitúe para a Deputación un potente espazo de reivindicación do protagonismo feminino, tendo como exemplos recentes a homenaxe á actriz ourensá Mariana Carballal co premio 8-M da Deputación ou o apoio provincial ao estudo sobre o rol das mulleres no audiovisual galego en colaboración coa Asociación de Mulleres Cineastas e de Medios Audiovisuais”. 

Deseño do programa

A actividade constará da proxección do documental «Elas, produtoras executivas», unha peza na que se pon en valor o traballo das produtoras executivas contado en primeira persoa por elas mesmas, cun alto valor simbólico ao poder ser un referente para espertar vocacións entre a mocidade. E, ao remate, terá lugar un espazo de debate feminista, moderado pola xornalista Mónica V. Lopo, con algunhas das protagonistas do documental, que falarán sobre as súas experiencias, a súa traxectoria así como dos seus plans de futuro. 

O roteiro pola provincia de Ourense comeza hoxe, 15 de marzo no IES 12 de outubro da cidade de Ourense e a convidada para este primeiro debate será a produtora Sofía Arangüena. Ao día seguinte, o 16 de marzo, será a quenda do IES García Barbón de Verín, coa produtora Adriana P. Villanueva. Na semana do 20 de marzo o roteiro continuará no IES Eduardo Blanco Amor na cidade de Ourense e o 21 será a quenda do IES número I de O Carballiño. O 27 de marzo a actividade chegará ao IES Martaguisela de O Barco de Valdeorras e xa en abril, pechará a súa andaina no IES Cidade de Antioquía de Xinzo de Limia con Alba Prol.