No concurso para fomentar a sostenibilidade e o comercio local participaron centros educativos da comarca
A Asociación Empresarial de Valdeorras entregou os premios do certame de deseño «Valdeorras sostible» convocado co apoio do Inorde para promocionar a economía circular e o comercio de proximidade na comarca. Para iso, convocouse un concurso de creatividade no que se convidou a participar a todos os centros educativos da zona para que o alumnado de entre 10 e 13 anos (5º e 6º de Primaria e mais 1º e 2º da ESO) deseñara a súa proposta para ilustrar eses conceptos: a sostenibilidade e o comercio local.
De entre todos os debuxos presentados, o xurado seleccionou tres propostas como finalistas. O 1º premio foi para Leire Gómez Calvo, do CEIP de Casaio; o 2º premio para María Tato Alonso, do CEIP Condesa de Fenosa; e o 3º premio para Lara Prada Vidal, do Colexio Divina Pastora. As tres autoras recibiron, ademais dun diploma, un vale de 150€ cada unha para gastar en comercios asociados a AEVA.
Unha adaptación do logo gañador, o deseñado por Leire Gómez, estará ademais nas bolsas de tela que AEVA vai imprimir e repartir entre os comercios asociados nas próximas semanas para que as distribúan entre os seus clientes.
Fortalecer vínculos coa comunidade
Na entrega dos premios, a presidenta de AEVA, Araceli Fernández, destacou como esta iniciativa buscaba consolidar o vínculo das empresas da comarca cos centros educativos e fomentar a participación da comunidade na promoción e apoio ao comercio local.
Fernández destacou a alta participación dos escolares e agradeceu a súa participación aos equipos dos centros participantes: o IES Cosme López e o Colexio Pablo VI da Rúa, o CEIP de Casaio, o CEIP Condesa de Fenosa ,o IES Martaguisela do Barco, o Colexio Divina Pastora, e o CEIP Xosé Manuel Folla Respino de Vilamartín.
