Terá lugar o luns 14 de marzo e os interesados deben inscribirse na web de AEVA
A comarca de Valdeorras acolle o programa Camiño de Futuro, iniciativa da Xunta de Galicia que dá continuidade a Camiño da Innovación, desenvolta a finais do pasado ano en diferentes puntos do territorio galego.
Ambas teñen como obxectivo dar a coñecer as diferentes liñas de axudas en Galicia dispoñibles para pequenas empresas para mellorar a súa competitividade e facilitar o seu crecemento, así como impulsar a innovación, internacionalización e sustentabilidade entre as máis afastadas dos núcleos urbanos.
Esta sesión, que terá lugar o vindeiro luns 14 de marzo a partir das 12,00 horas na Casa grande de Viloria (O Barco), contará coas intervencións de Patricia Argerey, directora da Axencia Galega de Innovación (GAIN); Marisol Novoa, presidenta da Confederación Empresarial de Ourense; técnicos de IGAPE e GAIN, representantes dos Grupos de Desenvolvemento Rural (GDR) e xerentes de diferentes pemes galegas con experiencias en materia de innovación de éxito.
Os interesados en participar deben inscribirse previamente nun formulario ao que poderán acceder na páxina web da Asociación de Empresarios de Valdeorras (AEVA).
