O ciclo cultural abrirá a programación cultural do verán no Barco e desenvolverase en tres lugares do municipio
“De Perto, a palabra contada, cantada e rimada”, o ciclo que abre a programación cultural do verán no Barco, celebrarase entre os días 1 e 28 de xullo en varias localizacións, organizado pola Concellería de Cultura.
O cartel desta edición é unha creación de Ángel Fernández, estudante de 4º da ESO (Arte) do IES Martaguisela. A súa obra foi seleccionada entre as preto de dez presentadas polos alumnos deste centro.
A meirande parte das actividades do “De Perto” serán, coma sempre, nos xardíns da Casa Grande de Viloira, pero tamén se
achegarán ao Mosteiro de Xagoaza, á Torre do Castro e á Praia Fluvial do Malecón.
Serán en total 8 espectáculos, que se desenvolverán todos os martes do mes e tamén tres venres.
“De Perto” permitirá, de novo, que a veciñanza volva a atoparse arredor da palabra, con espectáculos de narración oral, teatro, poesía escénica e música folk e tradicional. Estefanía Surreira, Fátima Delgado, Xoán Curiel, Simone Negreira, Sole Felloza, Dani Blanco, Alana e Ítaca Teatro son os nomes que nesta edición enchen o programa de “De Perto”.
Os emprazamentos elixidos para todas as actividades -xardíns da Casa Grande de Viloira, Torre do Castro e Praia Fluvial- son lugares especiais, cheos de maxia e ideais para que se conxunten en harmonía todos os elementos necesarios para que o ciclo se
desenvolva nun ambiente de calma e serenidade, cun marco natural, amable e acolledor.
O primeiro espectáculo será o 1 de xullo a cargo de Estefanía Surreira, narradora de Portugal, que falará de «Contos da vida e da morte».
