O proxecto, que verá a luz no 2025, pretende mellorar a seguridade viaria dos peregrinos
O proxecto de mellora da seguridade viaria dos peregrinos nos Camiños de Santiago que vén de aprobar a Xunta de Galicia incluirá o tramo no Camiño de Inverno na estrada OU-933 próximo ao parque empresarial de As Pedreiras, entre o parque comarcal de bombeiros e o desvío cara o núcleo de Roblido, no concello de A Rúa.
A Xunta de Galicia aclara así que esta é unha das zonas inventariadas e diagnosticadas dos tramos comúns nos Camiños de Santiago nos que se actuará nos vindeiros meses e que, de xeito conxunto actuará en máis de 150 quilómetros dos nove caminos de Santiago para afastar aos peregrinos das zonas perigosas de circulación.
A idea é evitar que as persoas peregrinas e aos usuarios en xeral transiten polas zonas de circulación de vehículos creando sendas peonís alternativas. Para iso, a Axencia Turismo de Galicia realizou un estudo de inventariado e diagnose dos tramos comúns nos Camiño de Santiago onde o peregrino comparte estradas de distinta titularidade (provincias, autonómicas ou estatais) cos vehículos, como é o caso da zona referida.
Así, tras a diagnose, avaliado o seu estado e identificados posibles riscos desde o punto de vista da seguridade viaria, planificáronse as actuacións necesarias que permiten mellorar os tramos comúns no que respecta á súa sinalización, estado de conservación e seguridade.
Este proxecto para a mellora da seguridade viaria enmárcase no obxectivo da Xunta de Galicia por traballar na excelencia da experiencia da peregrinación, un dos obxectivos do Plan Director dos Camiños de Santiago 2027. Búscase, ademais, ir reforzando a seguridade dos peregrinos que cada vez son máis numerosos polos distintos itinerarios, e o número de Compostelas medra a un ritmo do 13%.